ზუგდიდში სამი აფეთქება მოხდა – შსს
ღამით ზუგდიდში სამი აფეთქება მოხდა – ორი რკინიგზის მიდამოებში, ხოლო მესამე ქალაქის პოლიციის ქვეგანყოფილებასთან. მსხვერპლი არ არის.
შსს-ს ცნობით, პირველად 10 ივნისს 23:55 საათზე ზუგდიდის რკინიგზის სადგურზე აფეთქდა გაჩერებული სატვირთო ვაგონი, რა დროსაც ”სხეულის მძიმე დაზიანებები” მიიღო მატარებლის ელექტრიკოსმა შალვა ოქრომჭედლიშვილმა, რომელიც მოთავსებულია ზუგდიდის საავადმყოფოში.
ასევე 11 ივნისს 00:25 საათზე აფეთქებულ იქნა რკინიგზის სადგურზე მდებარე სანაგვე ურნა, 02:50 საათზე კი აფეთქდა ზუგდიდის რაიონული შს სამმართველოს პოლიციის ქვეგანყოფილების წინ მდგარი სატვირთო ავტომანქანა. გამოძიებას აწარმოებს სამეგრელო-ზემო სვანეთის სამხარეო მთავარი სამმართველო.
”აღნიშნული აფეთქებები განხორციელებულია მათ მიერ ვისაც არ სურს, რომ აღნიშნულ რეგიონში იყოს მშვიდობა და სტაბილურობა,”- ნათქვამია შსს-ის განცხადებაში.
ზუგდიდში გუშინ ღამით იმყოფებოდა რკინიგზის დეპარტამენტის ხელმძღვანელი ირაკლი ეზუგბაია. მისი თქმით, აფეთქებები რკინიგზის მუშაობის გრაფიკზე გავლენას არ მოახდენს.
”მიმდინარეობს დაზიანების გაწმენდა და ამის შემდეგ ჩვეულებრივი გრაფიკით აღვადგენთ მოძრაობას,”- განაცხადა ეზუგბაიამ.
ეს რკინიგზაზე მომხდარი აფეთქების უკვე მეორე შემთხვევაა სამეგრელოს რეგიონში. 2 ივნისს ასაფეთქებელი ნივთიერება ზუგდიდი-ხობის სარკინიგზო მონაკვეთზე ამოქმედდა.
This post is also available in: English (ინგლისური) Русский (რუსული)