ბაქო საქართველოდან სომხეთში რუსული შეიარაღების გადატანის გეგმას აპროტესტებს

აზერბაიჯანის საგარეო საქმეთა სამინისტრომ 23 მაისს რუსეთის ელჩი აზერბაიჯანში პიოტრ ბურდიკინი მიიწვია და ნოტა გადასცა, რომელშიც ბაქო შეშფოთებას გამოხატავს ამჟამად საქართველოში განლაგებული რუსული სამხედრო ტექნიკის სომხეთში გადატანის თაობაზე, იტყობინება აზერბაიჯანის საგარეო საქმეთა სამინისტრო.

აზერბაიჯანის საგარეო საქმეთა სამინისტროს ცნობით, შეიარაღების საქართველოდან სომხეთში გადატანის გეგმები “არ ემსახურება რეგიონში მშვიდობისა და უსაფრთხოების ინტერესებს და კიდევ უფრო გაამწვავებს დაძაბულობას“.

რუსეთის გენშტაბის უფროსმა იური ბალუევსკიმ 19 მაისს განაცხადა, რომ საქართველოდან რუსული სამხედრო ბაზების ნაწილი რუსეთში, ნაწილი კი სომხეთში იქნება გაყვანილი. მისი თქმით, სწორედ ამ გადაწყვეტილებამ მისცა რუსეთს შესაძლებლობა ბაზების გაყვანის ვადები ოთხ წლამდე შეემცირებინა.

This post is also available in: English (ინგლისური) Русский (რუსული)