რუსეთმა აფხაზეთში დამატებითი ძალები შეიყვანა

საქართველომ გააფრთხილა, რომ აფხაზეთში დამატებითი რუსული კონტინგენტის შეყვანა ”საგანგაშოდ ზრდის კონფლიქტის ესკალაციის რისკს”.

აფხაზეთის კონფლიქტის ზონაში უკვე შევიდნენ რუსეთის სამშვიდობო კონტინგენტის დამატებითი ძალები, იტყობინება ”რია ნოვოსტი” 1 მაისს რუსეთის თავდაცვის სამინისტროს ოფიციალურ წარმომადგენელზე დაყრდნობით.

ამავე ინფორმაციის თანახმად, ამ ძალების დისლოკაციის ადგილი ტყვარჩელის რაიონში იქნება.

რუსეთი აცხადებს, რომ სამშვიდობოთა რაოდენობა არ აღემატება 1994 წლის შეთანხმებით გათვალისწინებულ კვოტას. დსთ-ს ლიდერთა 1994 წლის 22 აგვისტოს გადაწყვეტილებაში ნათქვამია, რომ აფხაზეთის კონფლიქტის ზონაში განთავსებული სამშვიდობოების რაოდენობა უნდა შეადგენდეს 2 500-3 000-ს.

საქართველოს ხელისუფლების წარმომადგენლებმა 30 აპრილს განაცხადეს, რომ მძიმე არტილერიამ, ჯავშანტექნიკამ და დამატებითმა სამხედრო ნაწილებმა უკვე გადმოკვეთეს რუსეთ-საქართველოს საზღვარი მდინარე ფსოუზე. 

”საქართველომ არაერთხელ მიუთითა, რომ რუსეთის შეიარაღებული კონტიგენტი წარმოადგენს დესტაბილიზაციის მთავარ ფაქტორს კონფლიქტის ზონებში,” – განაცხადა საქართველოს საგარეო უწყებამ 30 აპრილს, ”რუსული სამხედრო ძალის ზრდა აფხაზეთში, საქართველო წარმოადგენს უკიდურესად საშიშ პროვოკაციას, რომელიც საგანგაშოდ ზრდის კონფლიქტის ესკალაციის რისკს და სერიოზულად ემუქრება საერთაშორისო მშვიდობასა და უსაფრთხოებას”.