თბილისი ცხინვალში შსკ-ს არაოფიციალური შეხვედრის ჩატარებისკენ მოუწოდებს

ქართული მხარე კიდევ ერთხელ ადასტურებს, რომ მზად არის თებერვლის მეორე დეკადაში დაგეგმილი შერეული საკონტროლო კომისიის (შსკ) თანათავმჯდომარეების არაფორმალურ შეხვედრაში მიიღოს მონაწილეობა.

”რაც შეეხება შეხვედრის ადგილს, ჩვენ მიზანშეწონილად მიგვაჩნია შეხვედრის გამართვა საქართველოს ტერიტორიაზე, კერძოდ კი ქალაქ ცხინვალში”,- ნათქვამია კონფლიქტების მოგვარების საკითხებში საქართველოს სახელმწიფო მინისტრის აპარატის მიერ 30 იანვარს გავრცელებულ განცხადებაში.

ეუთოს მოქმედმა თავმჯდომარემ, ესპანეთის საგარეო საქმეთა მინისტრმა მიგელ ანხელ მორატინოსმა მოუწოდა კონფლიქტის მხარეებს განაახლონ მოლაპარაკებები და დაძაბულობის შემცირების ეფექტური გზები ეძიონ.

This post is also available in: English (ინგლისური) Русский (რუსული)