უწყებათაშორისი კომისია ოპტიმიზაციის მოტივით თანამშრომელთა დათხოვნის შეჩერებისკენ მოუწოდებს

თავისუფალი და სამართლიანი არჩევნების უწყებათაშორისი კომისია მოუწოდებს ადმინისტრაციულ ორგანოებს საარჩევნო პერიოდში შეაჩერონ ოპტიმიზაციის პროცესი, რათა თავიდან იქნას აცილებული „პოლიტიკური მოტივით გათავისუფლების საფუძვლიანი თუ უსაფუძვლო ბრალდებები“.

31 მაისს გავრცელებულ განცხადებაში ეროვნული უშიშროების საბჭოსთან ახალადშექმნილი კომისია აცხადებს, რომ საარჩევნო გარემოზე დამკვირვებელ სამოქალაქო სექტორის წარმომადგენლებთან შეხვედრებზე გამოიკვეთა საჯარო სექტორიდან თანამშრომელთა გათავისუფლების პრობლემა, რაც დამკვირვებელთა განცხადებით, სავარაუდო პოლიტიკური მოტივაციის ნიშნებს შეიცავს.

ასეთი ფაქტები, გარდა იმისა, რომ ქართული მედიით შუქდება, ასევე აღწერილია სამართლიანი არჩევნებისა და დემოკრატიის საერთაშორისო საზოგადოების მიერ მაისში გამოქვეყნებულ წინასაარჩევნო გარემოს მონიტორინგის პირველ შუალედურ ანგარიშში. 1 აპრილიდან 4 მაისამდე პერიოდში დაფიქსირდა სავარაუდოდ პოლიტიკური მოტივით სამსახურიდან გათავისუფლების 10, მუქარის 9, დარბევის 1, ბიზნესმენებზე/კერძო მესაკუთრეებზე პოლიტიკური მიზნით ზეწოლის 6, ჟურნალისტების საქმიანობისათვის ხელის შეშლის 3 შემთხვევა, ნათქვამია ანგარიშში. საჯარო სამსახურიდან გათავისუფლებასთან დაკავშირებით „სამართლიანი არჩევნების“ მიერ აღწერილ ათივე შემთხვევას, საიდანაც ექვსი პედაგოგებს ეხებოდათ, რეგიონებში ჰქონდა ადგილი და ყველა გათავისუფლებული პირი აცხადებდა, რომ ისინი „ქართულ ოცნებასთან“ პირდაპირი თუ ირიბი კავშირის გამო გაუშვეს სამსახურებიდან. 

სულ ბოლო შემთხვევა, რომლის ირგვლივაც გათავისუფლების პოლიტიკურ მოტივაციაზე გამოითქვა ვარაუდები, გამოცდების ეროვნული ცენტრის ხელმძღვანელის მაია მიმინოშვილის მოხსნას უკავშირდებოდა. 

„დაუშვებელია და კანონსაწინააღმდეგოა საჯარო მოხელეების სამსახურიდან გათავისუფლება მათი ან მათი ოჯახის წევრების პოლიტიკური პოზიციის გამო. შემთხვევა, სადაც მსგავსი ნიშნები იკვეთება, შესწავლის საგანი უნდა გახდეს“, – აცხადებს უწყებათაშორისი ჯგუფი.

თუმცა კომისია იქვე აღნიშნავს, რომ შეიძლება „ხშირად რთული იყოს უტყუარი ფაქტის დადგენა ამა თუ იმ პირის გათავისუფლების რეალური მოტივის შესახებ“, რადგან სხვადასხვა უწყებებში შესაძლოა ოპტიმიზაციის ლეგიტიმური პროცესი მიმდინარეობდეს.

ამის გამო, კომისია ადმინისტრაციულ ორგანოებს, მათ შორის საჯარო სკოლებს, საარჩევნო პროცესის გათვალისწინებით რეკომენდაციით მიმართავს „ამ ეტაპზე  დაგეგმილი ან შესაძლო ოტპიმიზაციის პროცესი შეაჩერონ და მხოლოდ დისციპლინარული ან სხვა სახის დარღვევის შემთხვევებში მიიღონ შესაბამისი გადაწყვეტილებები“.