გილაური სინგაპურელ ინვესტორებს ჰიდროელექტროსადგურებში ინვესტირებას სთავაზობს

საქართველო სინგაპურის სახელმწიფო საინვესტიციო კომპანიებს საქართველოს ჰიდროელექტროსადგურებში და ნავთობის გადამუშავების ბიზნესში ინვესტირების შესაძლებლობის შესწავლას შესთავაზებს, განაცხადა საქართველოს პრემიერ–მინისტრმა ნიკა გილაურმა, რომელიც მიმდინარე კვირას სინგაპურს სტუმრობს.

ვიზიტის ფარგლებში პრემიერ-მინისტრი შეხვედრებს გამართავს სინგაპურის სახელმწიფო საინვესტიციო ფონდის GIC–ის და სახელმწიფო საინვესტიციო კომპანიის Temasek Holdings-ის წარმომადგებლენთან.

"კონკრეტული შეთავაზება გვექნება და ჰიდროელექტროსადგურებზე გვინდა გავამახვილოთ ყურადღება, რადგანაც ვიცით, რომ ეს მათი მიმართულებაც არის და უნდათ ენერგეტიკაში ინვესტიციების განხორციელება. ეს ორი მიმართულება იქნება – ჰიდროელექტროსადგურები და ნავთობის გადამუშავება. ეს იქნება ორი პროექტი, რომელსაც შევთავაზებთ Temasek–ს და GIC–ის,“ – განაცხადა საქართველოს პრემიერ–მინისტრმა.

18 მაისს გილაური სინგაპურის პრემიერ-მინისტრს ლი ჰსიენ-ლუნგს და სინგაპურის პრეზიდენტს სელაპან რამანათან ნათანს შეხვდა.

This post is also available in: English (ინგლისური) Русский (რუსული)