ევროკავშირის მისია პატრულირების პირველ დღეს აფასებს

საქართველოში პატრულირების პირველ დღეს რაიმე მნიშვნელოვან ინციდენტებს ადგილი არ ჰქონია, განაცხადა ევროკავშირის მონიტორინგის მისიამ 1 ოქტომბერს, მისი საქმიანობის დაწყების პირველი დღის დასასრულს.

პატრულირება ოთხივე რეგიონალური ოფისიდან  – ფოთი, ზუგდიდი, გორი და ბაზალეთი – დაიწყო.  

პატრულირება 14 ჯგუფმა განახორციელა – თითოეული შედგებოდა ორი მანქანისგან და რვა დამკვირვებლისგან, იტყობინება ევროკავშირის მონიტორინგის მისია.

მისიამ ასევე აღნიშნა, რომ პატრულმა შეძლო სამხრეთ ოსეთის მიმდებარე ტერიტორიაზე შესვლა სამ რუსულ საგუშაგოსთან; თუმცა, აფხაზეთში ისინი არ შესულან, რადგანაც ეს არც იყო მოსალოდნელი.

მისიამ ხაზი გაუსვა, რომ რუსული ძალების გასვლის ბოლო ვადა 10 ოქტომბერს იწურება, როგორც ამას ცეცხლის შეწყვეტის შესახებ შეთანხმება ითვალისწინებს.      
 

This post is also available in: English (ინგლისური) Русский (რუსული)