მაჭავარიანი ბექაურთან მისი ბიზნეს–კავშირების გარკვევას პროკურატურას სთხოვს
პარლამენტის ვიცე-სპიკერმა მიხეილ მაჭავარიანმა დღეს გენერალურ პროკურორს ზურაბ ადეიშვილს წერილით მიმართა, სადაც წინასწარ სამთვიან პატიმრობაში მყოფ “202”-ის თანადამფუძნებლის შალვა რამიშვილის დაკითხვას ითხოვს. მან ასევე წერილობით მიმართა სტუდია “რეპორტიორის“ ჟურნალისტს ვახტანგ კომახიძეს, რომელსაც დეპუტატ კობა ბექაურის უკანონო ბიზნეს-საქმიანობაზე გადაღებულ ფილმთან მის შესაძლო კავშირზე ინფორმაციის მიწოდება სთხოვა.
მაჭავარიანის ამ ნაბიჯებს წინ უძღვოდა “მემარჯვენე ოპოზიციის“ ლიდერის, დეპუტატ დავით გამყრელიძის მიერ მის წინააღმდეგ გაკეთებული ბრალდებები. 5 სექტემბერს გამყრელიძემ განაცხადა, რომ შალვა რამიშვილმა დაჭერამდე მას გააცნო იმ ფილმის დეტალები, რომელიც ბექაურის უკანონო საქმიანობისა და მასთან მაჭავარიანის კავშირის შესახებ სექტემბრიდან უნდა გასულიყო “202“–ის ეთერში. ფილმს, რომელიც ბექაურისთვის 100 ათასი დოლარის გამოძალვის მოტივით შალვა რამიშვილის დაპატიმრების არაპირდაპირი მიზეზი გახდა, სტუდია “რეპორტიორი“ ამზადებდა.
“მე თვითონ მაინტერესებს ამ საკითხის გარკვევა… ეს არის ჩემი ღირსების ამბავი“, განაცხადა დღეს პარლამენტის ბიუროს სხდომაზე მიხეილ მაჭავარიანმა.
მიხეილ მაჭავარიანის თხოვნით, გამყრელიძესთან მისი უთანხმოების მიზეზებს პარლამენტის საპროცედურო საკითხთა და წესების კომიტეტიც განიხილავს.