სეპარატისტ ლიდერთა შეხვედრა ერთი თვით გადაიდო

თვითგამოცხადებული აფხაზეთის დე ფაქტო საგარეო საქმეთა მინისტრმა სერგეი შამბამ 22 აპრილს “აფსნიპრესს“ განუცხადა, რომ თვითგამოცხადებული აფხაზეთის, სამხრეთ ოსეთის და დნესტრისპირეთის ლიდერთა შეხვედრა მაისის ბოლოს შედგება.

თუმცა მანამდე, შამბას განცხადებით, სოხუმში 28 აპრილს არაღიარებული რესპუბლიკების საგარეო უწყების პირველი პირები შეიკრიბებიან, სადაც შეფასებას მისცემენ 22 აპრილს სუამის სამიტის შედეგებს, განიხილავენ ურთიერთთანამშომლობის საკითხებს და შესაბამის დოკუმენტს მოაწერენ ხელს.

სერგეი შამბას განცხადებით 28 აპრილის შეხვედრაზე, რომელშიც წინასწარ ცნობილია, რომ მონაწილეობას არ მიიღებს მთიანი ყარაბაღის წარმომადგენლობა, შეთანხმდება სეპარატისტ ლიდერთა შეხვედრის დროც.

გავრცელებული ინფორმაციით, მოსალოდნელი იყო, რომ სეპარატისტი ლიდერები 22 აპრილს კიშინიოვში მიმდინარე სუამის სამიტის პარალელურად შეიკრიბებოდნენ.

This post is also available in: English (ინგლისური) Русский (რუსული)