24 ოქტომბრის შუალედური არჩევნები შედგა
24 ოქტომბერს საქართველოს პარლამენტის შუალედური მაჟორიტარული არჩევნები, რომელიც ოთხ საარჩევნო ოლქში გაიმართა, ცენტრალურმა საარჩევნო კომისიამ (ცსკ-ო) ჩატარებულად გამოაცხადა. ოფიციალური ინფორმაციით, ოთხივე ოლქში რეგისტრირებული 177 ათასზე მეტი ამომრჩევლიდან არჩევნებში მონაწილეობა 65 ათასმა ანუ 35%-მა მიიღო.
“ყველაზე მაღალი აქტოვობა გორსა და ზესტაფონში დაფიქსირდა, შედარებით დაბალი იყო აქტივობის მაჩვენებელი თბილისში – დიდუბისა და კრწანისის საარჩევნო ოლქებში”, განაცხადა ცსკ-ოს თავმჯდომარემ ზურაბ ნონიკაშვილმა.
თუმცა პარლამენტის მიერ 12 ოქტომბერს მიღებული გადაწყვეტილებით, რითაც შუალედურ არჩვნებში 1/3-იანი ბარიერი მოიხსნა, თითოეულ ოლქში ერთი ამომრჩევლის მისვლაც საკმარისი იყო არჩევნების ჩატარებულად გამოცხადებისთვის.
ნონიკაშვილის თქმით, არჩევნები მშვიდ ვითარებაში და მცირე, პროცედურული ტიპის დარღვევების ფონზე წარიმართა.
ცსკ-ო ჯერ-ჯერობით არ ფლობს ინფორმაციას, მათ შორის არც წინასწარს, გამარჯვებული კანდიდატების შესახებ. თუმცა სავარაუდოდ ოთხივე საარჩევნო ოლქში ხელისუფლების ფავორიტი კანდიდატები – გიორგი ასანიძე, თეიმურაზ ჭეიშვილი, თეიმურაზ ცერცვაძე და ჯუმბერ პატიაშვილი მოიპოვებენ საპარლამენტო მანდატებს.