ნოდარ ხაშბა: სასამართლომ საბოლოო სიტყვა უნდა თქვას არჩევნებზე
აფხაზეთის თვითგამოცხადებული რესპუბლიკის პრემიერ-მინისტრის მოვალეობის შემსრულებელმა ნოდარ ხაშბამ 12 ოქტომბერს განაცხადა, რომ თვითგამოცხადებული რესპუბლიკის უზენაესმა სასამართლომ “ბოლო სიტყვა უნდა თქვას [3 ოქტომბრის საპრეზიდენტო] არჩევნებზე“.
ნოდარ ხაშბამ, რომელიც არჩევნების შემდგომი კრიზისის ფონზე დაინიშნა პრემიერ-მინისტრის პოსტზე, სოხუმში აფხაზეთის ინტელიგენციის წარმომადგენლებთან შეხვედრისას მოსახლეობას სიმშვიდისა და სტაბილურობის შენარჩუნებისკენ მოუწოდა.
აფხაზეთის ცსკ-მ ოპოზიციის კანდიდატი სერგეი ბაღაფში გამარჯვებულად გამოაცხადა. თუმცა, დე ფაქტო პრეზიდენტმა ვლადისლავ არძინბამ დაგმო ცსკ-ს გადაწყვეტილება და მას უკანონო უწოდა. მისი თქმით, არსებულმა სიტუაციამ შესაძლოა “სისხლისღვრა გამოიწვიოს“.
უზენაესი სასამართლო 14 ოქტომბერს სახელისუფლებო კანდიდატის რაულ ხაჯიმბას სარჩელს განიხილავს, რომელიც ცსკ-ს გადაწყვეტილების გაუქმებას და აფხაზეთში განმეორებითი არჩევნების ჩატარებას მოითხოვს.
