სააკაშვილი აფხაზეთს „ფართო ავტონომიას“ სთავაზობს
საქართველოს პრეზიდენტმა მიხეილ სააკაშვილმა, რომელიც მოსკოვში 10 თებერვალს
ჩავიდა, განაცხადა, რომ აფხაზეთის კონფლიქტი რუსეთის პრეზიდენტთან ვლადიმერ
პუტინთან შეხვედრის ერთ-ერთი მთავარი თემა იქნება.
მოსკოვის რადიოსადგურ „ეხო მოსკვი“-სთვის მიცემულ ინტერვიუში მიხეილ სააკაშვილმა
კიდევ ერთხელ აღნიშნა, რომ აფხაზეთის კონფლიქტის მშვიდობიან მოგვარებას
საქართველოსთვის პრიორიტეტული მნიშვნელობა აქვს.
„ძალის გამოყენება [აფხაზეთის კონფლიქტის მოსაგვარებლად] ყველაზე უარესი
ალტერნატივაა, რაც შეიძლება არსებობდეს. 100 000-კაციანი არმიაც რომ გვყავდეს, მე
მაინც ვერ დავუშვებ კონფლიქტის სამხედრო გზით მოგვარებას. მაგრამ ყველამ უნდა
იცოდეს, რომ საქართველო არასოდეს დაუშვებს, რომ აფხაზეთი საქართველოს
შემადგენლობაში აღარ იყოს“, – განაცხადა სააკაშვილმა.
„მე დარწმუნებული ვარ, რომ აფხაზეთში საპრეზიდენტო არჩევნების შემდეგ [2004
წელს] ხელისუფლებაში ახალი ხალხი მოვა, რომლებიც მიხვდებიან, რომ მათ სჭირდებათ
მეგობრული ურთიერთობების დამყარება რუსეთთან და ამავე დროს საერთო ენის გამონახვა
საქართველოსთან“, – დასძინა სააკაშვილმა.
საქართველოს ახალმა პრეზიდენტმა განაცხადა, რომ თბილისი მზად არის აფხაზეთს
საქართველოს სახელმწიფოს ფარგლებში ფართო ავტონომიის სტატუსი მიანიჭოს.
„ჩვენ თანახმა ვართ ფედერაციულ ურთიერთობებზე აფხაზეთთან“, – აღნიშნა
სააკაშვილმა.
