დეპუტატები ტელეკომპანიებზე სავარაუდო ზეწოლის ფაქტს გამოიძიებენ

საპარლამენტო ოპოზიციამ სპეციალური კომისია შექმნა, რომელიც ორ წამყვან დამოუკიდებელ ტელეკომპანიაზე „რუსთავი 2“-ზე და „მზე“-ზე ხელისუფლების მხრიდან ზეწოლის სავარაუდო ფაქტებს გამოიძიებს.

ცოტა ხნის წინ „რუსთავი 2“-მა და „მზე“-მ ერთდროულად დახურეს ღამის საინფორმაციო პროგრამები. ამან გარკვეული ვარაუდი გამოიწვია იმის თაობაზე, რომ ხელისუფლება ამ ტელეკომპანიებზე ზეწოლას ახორციელებდა.

დეპუტატი კობა დავითაშვილი, რომელიც პრეზიდენტ სააკაშვილის ყოფილი მოკავშირეა, კომისიის ერთ-ერთი წევრი იქნება. დავითაშვილის განცხადებით, ტელეკომპანიების გადაწყვეტილება საპარლამენტო არჩევნების წინ საკმაოდ პოპულარული გადაცემების დახურვის თაობაზე სამართლიან ეჭვებს ბადებს.

„რუსთავი 2“-მა და „მზემ“ თავიანთი გადაწყვეტილება კომპანიებში მიმდინარე რეორგანიზაციით ახსნეს.