შევარდნაძე: მე ვერ დავუშვებდი სისხლისღვრას
(თბილისი, 25 ნოემბერი, 2003, სივილ ჯორჯია) – გერმანიის ტელევიზიისადმი მიცემულ ინტერვიუში ედუარდ შევარდნაძემ ისაუბრა მის მიერ გადადგომამდე მიღებულ გადაწყვეტილებებზე.
“მე მეგონა, რომ საგანგებო მდგომარეობის გამოცხადება და ჯარების მოსალოდნელი გამოყენება კრიზისის დასაძლევად, დაშლიდა ხალხს, მეგონა მათ შეეშინდებოდათ; თუმცა ძალიან ბევრნი იყვნენ. შეუძლებელი იყო მათი დაშლა სისხლისღვრის გარეშე”, – განაცხადა ედუარდ შევარდნაძემ.
“სისხლისღვრა შავი გვერდი იქნებოდა ჩვენს ისტორიაში. ამას ვერ დავუშვებდი, განსაკუთრებით ჩემი საპრეზიდენტო ვადის ამოწურვის წინ”, – დასძინა მან.
“დემოკრატიას ღვედები აქვს, რომლებიც ძალიან არ უნდა მოუშვა. ბევრი დემოკრატია არ ვარგა. ვფიქრობ ეს ჩემი შეცდომა იყო. ჩვენი ხალხი აბსოლუტურად მოუმზადებელი აღმოჩნდა დემოკრატიის ამხელა დოზისთვის”, – განაცხადა შევარდნაძემ.
შევარდნაძემ კიდევ ერთხელ დაადასტურა, რომ იგი ქვეყანაში რჩება და გერმანიაში გამგზავრებას არ აპირებს.
“მე მიყვარს გერმანია, მაგრამ საქართველო ჩემი სამშობლოა”, – განაცხადა შევარდნაძემ.