აღორძინება, ლეიბორისტული პარტია და მრეწველები “რუსთავი 2”-ს სიტუაციის დაძაბვაში ადანაშაულებენ

(თბილისი, 10 ნოემბერი, 2003, სივილ ჯორჯია) – ლეიბორისტული პარტიის, “მრეწველთა” და “აღორძინების” ლიდერებმა დამოუკიდებელი ტელეკომპანია “რუსთავი-2” ქვეყანაში სიტუაციის დაძაბვაში დაადანაშაულეს და მოსახლეობას ტელეკომპანიის ბოიკოტისკენ მოუწოდეს.   

“რუსთავი-2″ ქვეყანაში სიტუაციის გაუარესებას ისახავს მიზნად. დღეიდან ჩვენ ვიწყებთ ფართომასშტაბიან აგიტაციას კომპანიის წინააღმდეგ და მოსახლეობას მოვუწოდებთ ტელეკომპანიას ბოიკოტი გამოუცხადონ”, – განაცხადა “აღორძინების” თბილისის რეგიონალური ორგანიზაციის ხელმძღვანელმა ცოტნე ბაკურიამ 10 ნოემბერს გამართულ ბრიფინგზე.

მრეწველთა ლიდერმა გოგი თოფაძემ განაცხადა, რომ “ის საპროტესტო აქციები, რომლებიც ამჟამად ქვეყანაში მიმდინარეობს, “რუსთავი-2”-ის მიერ ჩატარებული “ეგზით პოლების” შედეგია”.

საპარლამენტო არჩევნების ოფიციალური შედეგებით, 2 ნოემბერს ჩატარებული არჩევნების შედეგად სახელისუფლებო ბლოკი და “აღორძინება” ლიდერობენ, მაშინ როცა “ეგზით პოლებისა” და ხმების პარალელური დათვლის შედეგებით, უპირატესობა ოპოზიციურმა პარტიებმა მოიპოვეს.
 
“რუსთავი-2” უკვე დიდი ხანია ხელისუფლების კრიტიკის ობიექტია. 2001 წელს ხელისუფლების მიერ ტელეკომპანიაში სამართალდამცავთა დიდი ჯგუფის შეგზავნას თითქოსდა ფინანსური საქმიანობის შემოქმების მიზნით მასობრივი საპროტესტო აქციები და მთავრობის გადადგომა მოჰყვა.