ახალი ამბები
ეუთო სომხეთისა და საქართველოს ცენტრალურ საარჩევნო კომისიებს საარჩევნო ურნების განაწილებაში დაეხმარება
(თბილისი, 30 ოქტომბერი, 2003, სივილ ჯორჯია) – სომხეთისა და საქართველოს ცენტრალურმა საარჩევნო კომისიებმა (ცსკო) 28 ოქტომბერს ხელშეკრულებას მოაწერეს ხელი, რომლის თანახმადაც სომხეთის ცსკო საქართველოს არჩევნებისთვის 1000 გამჭირვალე საარჩევნო ურნას ათხოვებს.
ერევანში ეუთო-ს ოფისისა და საქართველოში ეუთოს მისიის მჭიდრო თანამშრომლობის შედეგად მოხდა შესაძლებელი ამგვარი ხელშეკრულების გაფორმება.
“ეს სამხრეთ კავკასიაში რეგიონალური თანამშრომლობის კარგი მაგალითია დემოკრატიული არჩევნების ხელშეწყობის მიზნით”, – განაცხადა საქართველოში ეუთოს მისიის ხელმძღვანელმა როი რივმა.
საქართველოში ეუთოს მისიის მიერ გავრცელებულ პრესრელიზში ნათქვამია, რომ ხელშეკრულების თანახმად, არჩევნების ჩატარების შემდეგ საარჩევნო ურნები სომხეთში დაბრუნდება.