აფხაზები ვაჰაბიტებს რუსულ პასპორტებს აძლევენ, – აცხადებს უშიშროების მინისტრი
(თბილისი, 15 თებერვალი, 2003, სივილ ჯორჯია) – “ვაჰაბისტთა დაჯგუფება პანკისის ხეობიდან აფხაზეთის ტერიტორიაზე გადაადგილდა და რუსეთი მათი მხრიდან შესაძლო დარტყმას სწორედ აქედან უნდა ელოდოს”, – ასეთი განცხადება საქართველოს უშიშროების მინისტრმა ვალერი ხაბურძანიამ დღეს სახელმწიფო კანცელარიაში მთავრობის გაფართოებულ სხდომაზე გააკეთა.
მისი თქმით, ვაჰაბისტებზე აფხაზეთში გაიცემა საბჭოთა ტიპის პასპორტები თავისუფლად გადაადგილებისთვის.
მინისტრის ინფორმაციით, აფხაზეთში არსებობს 4 შეიარაღებული დაჯგუფება, რომელთაც იარაღით რუსეთის მხარე ამარაგებს და მიმდინარებობს ერთობლივი სამხედრო წვრთნა. “მათ შორისაა ჩეჩნურ-აფხაზური და სომხურ-აფხაზური დაჯგუფებებიც” – აცხადებს ხაბურძანია.
იგი ასევე აფხაზ სამართალდამცველებს ამხელს მთელ რიგ კანონდარღვევებში და ქართველების წინააღმდეგ მიმართულ ქმედებებში. “ჩემი ინფორმაციით, რუსი მაღალჩინოსნების მიერ აფხაზეთის ტერიტორიაზე ხდება სხვადასხვა შენობების და ადგილების შესყიდვა. ასევე 300-500 დოლარად ყიდიან ქართველების საცხოვრებელ სახლებს იმ მოტივით, რომ არ იხდიან კომუნალურ გადასახადებს”, – აცხადებს ხაბურძანია.
მინისტრი არ გამორიცხავს, რომ აფხაზეთში ვითარების დაიძაბვას “საპრეზიდენტო არჩევნების” მოახლოებასთან ერთად, “რადგან ამ პოსტის ხელში ჩასაგდებად რამდენიმე გავლენიანი პირი იბრძვის. უპირატესობით კი ჯერ-ჯერობით საგარეო საქმეთა კომისიის ხელმძღვანელი რუსლან არძინბა და პარლამენტის თავმჯდომარე ვალერი აშბა სარგებლობენ”, – აცხადებს ხაბურძანია.
უშიშოროების მინისტრი თავის მოხსენებაში ასევე შეეხო “სამხრეთ ოსეთში” მიმდინარე მოვლენებს. მისი თქმით, აქაც ჩრდილოეთ ოსეთ-ალანიის გავლით რუსეთიდან შემოტანილია სამხედრო აღჭურვილობა. “ამას საქართველოს მხრიდან შესაძლო აგრესიის დაწყებით ხსნიან, რაც აბსურდია”, – თქვა ხაბურძანიამ.
მინისტრი მომხრეა, რომ აფხაზეთში და ე.წ. “სამხრეთ ოსეთის” ტერიტორიაზე ჩატარდეს პანკისის ხეობაში ჩატარებული ოპერაციის მსგავსი ღონისძიება, თუმცა აცხადებს, რომ ამ საკითხების მოგვარება მშვიდობიანი გზით უნდა მოხდეს.
