პრემიერი აქონდროპლაზიის მქონე ბავშვების მშობლებს: პოლიტიკოსებს ნუ გამოაყენებინებთ თავს

„ნუ გამოაყენებინებენ თავს და ნუ მიიღებენ ამ პოლიტიკურ კამპანიაში მონაწილეობას ნებსით, თუ უნებლიეთ“, – ასე უპასუხა საქართველოს პრემიერმინისტრმა, ირაკლი ღარიბაშვილმა 24 აპრილს მთავრობის სხდომის დაწყების წინ აქონდროპლაზიის დიაგნოზის მქონე ბავშვების მშობლების პროტესტს, რომლებიც მასთან შეხვედრის მოთხოვნით უკვე რამდენიმე დღეა მთავრობის ადმინისტრაციასთან უწყვეტ აქციებს მართავენ. პრემიერი პროტესტის მონაწილეებს ამ დრომდე არ შეხვედრია.

პრემიერმა „სოლიდარობა“ და „სრული თანაგრძნობა“ გამოხატა აქონდროპლაზიის დიაგნოზის მქონე ბავშვების მიმართ და უთხრა, რომ „მთავრობა, სახელმწიფო მათ გვერდით დგას“ და გააკეთებს „ყველაფერს, რაც საჭიროა“. მანვე ხაზი გაუსვა, რომ სახელმწიფოს უარი არ უთქვამს დაავადების საწინააღმდეგო მედიკამენტის დაფინანსებაზე და „თანხაზე საუბარი არ არის“. „საუბარია იმაზე რომ ეს პროცესი სწორად იმართოს და ჩვენ ამ წამლის მიცემით რაღაც დიდი უბედურება არ დავმართოთ ამ ადამიანებს“.

პრემიერის თქმით, მიუხედავად იმისა, რომ დაავადების საწინააღმდეგო მედიკამენტი – „ვოზორიტიდი“ ამერიკის შეერთებულ შტატებში გამოიგონეს, ის თავად „ჯერ არ აფინანსებს ამ პროგრამას“ და „ჯერ კიდევ ელოდებიან მეოთხე ფაზის დასრულებას, კვლევებს, გვერდითი ეფექტების [და] უარყოფითი შედეგების გამოვლენას“. მანვე აღნიშნა, რომ პროგრამის დაფინანსება შეაჩერა დიდმა ბრიტანეთმაც და „ევროპაში[ც] მიმდინარეობს დისკუსია ამაზე“.

„ასევე ჩვენ, როგორც ჯანდაცვის მსოფლიო ორგანიზაციის (ჯანმო) წევრი ქვეყანა, ვეყრდნობით მათ გაიდლაინებს, მათ ინსტრუქციებს, მითითებებს. რამდენიმე დღის წინ, გამოვიდა ჯანდაცვის მსოფლიო ორგანიზაციის წარმომადგენელი, რომელიც საქართველოში იმყოფება და მან დეტალურად განმარტა, რომ ჯერ ჯანმო არ ცნობს ამ წამალს და არ იძლევა რეკომენდაციას, რომ ასეთი პროგრამით მოხდეს დაფინანსება“, – ხაზი გაუსვა ირაკლი ღარიბაშვილმა.

ამიტომ, პრემიერი მიიჩნევს, რომ „საჭირო არის ცოტა მოცდა“. „დრო გვჭირდება, მინდა მივმართო ამ ბავშვების მშობლებს, სამინისტრო არის მზად რომ ერთად გავიაროთ ეს პროცესი, ეს გზა. დაველოდოთ ჯანდაცვის მსოფლიო ორგანიზაციის დასკვნებს, მათ მითითებებს და ამის შემდეგ მოხდება ამ პროგრამის ამოქმედება“, – თქვა მან და გაიმეორა, რომ ამ მედიკამენტით მკურნალობას მსოფლიოს არცერთი სახელმწიფო პროგრამა აფინანსებს და „ჩვენ გვეუბნებიან საქართველო იყოს გამონაკლისი და უპასუხისმგებლოდ, პოპულისტურად ჩავერთოთ ამ პროგრამაში, რაც არის დაუშვებელი“.

„მეც რამდენიმე საერთო ნაცნობი მყავს, რომლის შვილიც ასეთი დიაგნოზით არის და მათ სიცოცხლეს საფრთხე არ ემუქრება. ძალიან ბევრი ცნობილი ადამიანი ვიცი მთელს მსოფლიოში, რომლებიც არიან წარმატებული და მათი დისკრიმინაცია არ შეიძლება საერთოდ. ჩვენ ამისკენ უნდა ვიყოთ მოწოდებული“, – განაცხადა პრემიერმა ღარიბაშვილმა და დასძინა – „ყველაფერი იქნება ძალიან კარგად, ჩვენ დაველოდებით რამდენიმე თვე…, როგორც კი გადაწყდება აღნიშნული საკითხი, რამდენიმე ქვეყანა დაიწყებს ამ გაიდლაინით მკურნალობას, ჩვენც ჩავერთვებით პროგრამაში“.

ირაკლი ღარიბაშვილმა საკითხის გარშემო ბოლო დღეებში შექმნილ „ვნებათაღელვააზეც“ გაამახვილა ყურადღება და „უპასუხისმგებლო პოლიტიკოსები“, რომლებიც „გამოირჩევიან სიყალბითა და ფარისევლობით“, „უმწეო ბავშვების“ გამოყენებით „პოლიტიკური კამპანიის“ წარმოებაში დაადანაშაულა.

„… არავის არ გახსენებია, არცერთ პოლიტიკოსს, რომელიც ახლა ჩართულია ამ კამპანიაში, ამ ბავშვების ბედი, საერთოდ არ გახსენებიათ არც მათი მდგომარეობა, არც არაფერი, არც მაშინ, როდესაც იყვნენ ხელისუფლებაში და არც მაშინ, როდესაც არიან ოპოზიციაში“, – თქვა მანვე და დაამატა, რომ ისინი ცდილობენ „გაჭირვებაში მყოფი ადამიანის ბედი გამოიყენონ საკუთარი პოლიტიკური ინტერესების მისაღწევად, რაც არის ამორალური საქციელი. ეს არის უზნეობა, ეს არის ყველაზე ზნედაცემული ქმედება, რაც შეიძლება ადამიანმა იკადროს“.

ამის შემდეგ, პრემიერმა, „ყალბ, ფარისეველ პოლიტიკოსებს“ მიმართა, რომ დაასრულონ „მათი ეს ყოველგვარი ამორალური ქმედება დაასრულონ და ნუ იყენებენ ამ ადამიანებს. ნუ იყენებენ ამ ადამიანების მშობლებს ამ ვიწრო პარტიული ინტერესებისთვის“. „ჩვენ არცერთ მოქალაქეს არ დავტოვებთ ყურადღების გარეშე და რაც საჭიროა გავაკეთებთ მაქსიმუმს. მაგრამ ამას ჭირდება დრო და ნაკლები ემოციები“, – განაცხადა პრემიერმა საკითხზე საუბრის დასასრულს.

მშობლების პასუხი

პრემიერის განცხადებით უკმაყოფილონი დარჩნენ მთავრობის ადმინისტრაციასთან პროტესტით ელოდნენ აქონდროპლაზიის დიაგნოზის მქონე ბავშვების მშობლები, რომლებმაც ადგილზე უკვე 5 ღამე გაათიეს. მათი მოთხოვნა კვლავ უცვლელია და ისინი ირაკლი ღარიბაშვილთან შეხვედრას ელოდებიან.

„პირადად ჩვენ მშობლებს გვითხრას რამდენი ხანი უნდა ველოდოთ კიდევ… გვითხრას, რამდენი დრო არის საჭირო, რომ კიდევ ასე ვიდგეთ მშობლები და შვილებთან მივდიოდეთ და ვეუბნებოდეთ, რომ ვერ გიმკურნალებთ“, – უთხრა ჟურნალისტებს ერთ-ერთმა მშობელმა და მიმართა პრემიერ ღარიბაშვილსა და ჯანდაცვის მინისტრს, ზურაბ აზარაშვილს გაატარონ მათ შვილებთან „თითო-თითო დღე და მიხვდებიან, რას ვითხოვთ და რატომ ვითხოვთ“.

„დღეს ჩვენ მშობლები ვართ ძალიან მკაცრნი, საბოლოო გადაწყვეტილების მოლოდინში, გაყინულნი და დამცირებულნი. ასეთი გამწარებული მაშინაც კი არ ვყოფილარ, როდესაც ჩემი შვილის დიაგნოზი გავიგე“, – თქვა კიდევ ერთმა მშობელმა და მიმართ პრემიერ ღარიბაშვილს უთხრას მათ „საბოლოო პასუხი – გვიფინანსებს, თუ არ გვიფინანსებს მედიკამენტს“. მანვე ხაზი გაუსვა, რომ ისინი სახლებში მედიკამენტის შეძენაზე დაპირებით არ წავლენ, რადგან დაპირებები ჯანდაცვის მინისტრისგან უკვე ერთ წელზე მეტია, რაც ითმინეს.

„მე ვარ „ქართული ოცნების“ წევრი 2015 წლიდან, ერთგულად გემსახურებოდით. მე თქვენივე პარტიასა და ჩემივე მაჟორიტარს ვთხოვე დახმარება, მე ვინც დამეხმარება, მე ის მინდა, რომ იყოს ჩემი მეგობარი. როგორ გგონიათ, ჩვენ მშობლები პოლიტიკურები ვართ?! არც ერთ პარტიას ჩვენ თვითონ არ მივცემთ ამის უფლებას. ისინი, უბრალოდ, თანაგრძნობას გვიცხადებენ“, – განაცხადა მანვე პრემიერის განცხადების მოწოდების საპასუხოდ, რომ არ მიიღონ მონაწილეობა პოლიტიკურ კამპანიაში.

დღესვე, აქონდროპლაზიის დიაგნოზის ბავშვებისთვის მედიკამენტების შესაძენად ხელისუფლებას „ყველა ზომის“ მიღებისკენ მოუწოდა არასამთავრობო ორგანიზაცია „სოციალური სამართლიანობის ცენტრმაც“. ორგანიზაცია ასევე მიმართა ხელისუფლებას: ინტენსიურად დაიწყოს მშობლებთან დიალოგი, ბავშვების საჭიროებებისა და გამოწვევების უკეთ იდენტიფიცირებისათვის; უმოკლეს ვადებში შეიმუშაოს და საზოგადოებასა და მშობლებს გააცნოს ზუსტი ხედვა (მათ შორის, საბიუჯეტო სახსრების გამოყოფის მიმართულებით) მედიკამენტის ქვეყანაში შემოტანასა და მასზე წვდომასთან დაკავშირებით; უმოკლეს ვადებში უზრუნველყოს მედიკამენტზე წვდომა, სულ მცირე, ყველაზე მწვავე საჭიროების მქონე ბავშვებისათვის.

„დაუფინანსეთ წამალი ბავშვებს“ – დღეს, ამ მოთხოვნით, 19:00 სთ-ზე მთავრობის ადმინისტრაციასთან კიდევ ერთი საპროტესტო აქცია გაიმართება.

ასევე წაიკითხეთ:

• 21/04/2023 – აქონდროპლაზიის მქონე ბავშვების მშობლები პრემიერთან შეხვედრის მოთხოვნით აქციას მართავენ
• 04/04/2023 – პროტესტის მიუხედავად ჯანდაცვის სამინისტრო აქონდროპლაზიის პრეპარატის შემოტანას არ გეგმავს

This post is also available in: English (ინგლისური) Русский (რუსული)