რუსეთის ფედერაციის საგარეო დაზვერვის სამსახურის პრესსამსახურმა 9 ივლისს განაცხადა, რომ ვაშინგტონს მტკიცედ აქვს გადაწყვეტილი, რომ „26 ოქტომბერს დაგეგმილი საპარლამენტო არჩევნების შემდეგ საქართველოში ხელისუფლების ცვლილებას მიაღწიოს“. საგარეო დაზვერვის სამსახურის თქმით, ბაიდენის ადმინისტრაციამ საქართველოს მმართველი პარტიის დისკრედიტაციის მიზნით „მასშტაბური საინფორმაციო კამპანია“ შეიმუშავა.
„ცნობილი გახდა ‘ჰოლივუდის საუკეთესო ტრადიციებით’ შეთხზული სცენარის მთავარი სიუჟეტური ხაზები. თეთრი სახლის ტიპიური ანტირუსული განწყობით, დაგეგმილია პროპაგანდისტული კამპანია სენსაციური გამოაშკარავებით: საქართველოს ყველა უბედურებაში რუსეთია დამნაშავე“, – ნათქვამია განცხადებაში.
რუსეთის ხელისუფლება ამტკიცებს, რომ გადამწყვეტი როლი ანტისახელისუფლებო განწყობების გაღვივებაში საქართველოს პრეზიდენტმა სალომე ზურაბიშვილმა უნდა შეასრულოს. განცხადების თანახმად, „ამერიკელმა კურატორებმა“ უკვე მისცეს დავალება ოპოზიციას, რომ საპარლამენტო არჩევნების პარალელურად ქვეყანაში საპროტესტო აქციები დაიწყონ.
განცხადების თანახმად, ასევე განიხილება დემონსტრანტთა შორის მსხვერპლის ხელოვნური შექმნა, რის შედეგადაც „ხალხის რისხვას“ სამართალდამცველებზე იქნება მიმართული. რუსული დაზვერვის თქმით, ამერიკელებს უკვე აქვთ ამგვარი „პროვოკაციების შესაბამისი გამოცდილება“. „საკმარისია, გავიხსენოთ კიევის „მაიდნის“ მოვლენები“, სადაც ასობით ადამიანი შეეწირა „დემოკრატიის სამსხვერპლოს“, რომლებიც, მათ შორის, ქართველმა დაქირავებულმა სნაიპერებმა მოკლეს“, – ნათქვამია განცხადებაში.
განახლება: 9 ივლისს გამართულ ბრიფინგზე აშშ-ს სახელმწიფო დეპარტამენტის პრესსპიკერი მეთიუ მილერი რუსეთის ბრალდებებს გამოეხმაურა და მათ „სრულიად მცდარი“ და „აბსურდული“ უწოდა. „ეს პირველი შემთხვევა არ არის, როდესაც რუსეთი მსგავს ბრალდებებს ავრცელებს საქართველოსა და მსოფლიოს სხვა ქვეყნებში აშშ-ის ჩართულობასთან დაკავშირებით, რაც სრულიად მცდარი და აბსურდულია. და მე უბრალოდ აღვნიშნავ ამ ქვეყნის, რუსეთის ირონიას, რომელსაც უკანონოდ აქვს ოკუპირებული საქართველოს ტერიტორიის 20% და ამ აბსურდულ ბრალდებებს სხვა ქვეყნის მიმართ აკეთებს“, – განაცხადა მილერმა.
მასალა განახლდა 10 ივლისს, 12:20 საათზე და მას აშშ-ის სახელმწიფო დეპარტამენტის კომენტარი დაემატა.
ასევე წაიკითხეთ:
-
-
-
-
