საქართველოს ფინანსთა მინისტრმა ივანე მაჭავარიანმა და მსოფლიო ბანკის რეგიონულმა დირექტორმა სამხრეთ კავკასიაში სებასტიან მოლინეუსმა საქართველოსთვის პროექტ Log-in Georgia-ს მხარდასაჭერად 35.7 მლნ ევროს შეღავათიანი სესხის გამოყოფის შესახებ შეთანხმებას 31 აგვისტოს მოაწერეს ხელი.
პროექტ Log-in Georgia–ს შესახებ, რომელიც საქართველოს ეკონომიკისა და მდგრადი განვითარების სამინისტროს ზედამხედველობით განხორციელდება, საქართველოს მთავრობამ 2020 წლის იანვარში განაცხადა. პროექტის მიზანი 1 000-მდე სოფლის, მათ შორის მაღალმთიანი დასახლებული პუნქტების, ასევე 500 000 ადამიანის მაღალი ხარისხის და ხელმისაწვდომ სწრაფ ინტერნეტსერვერთან დაკავშირებაა.
მსოფლიო ბანკის ინფორმაციით, პროექტი სამი კომპონენტისგან შედგება. ესენია:
- ფინანსურად ხელმისაწვდომ ფართოზოლოვან ინტერნეტთან წვდომის ზრდა;
- მაღალსიჩქარიან ინტერნეტთან დაკავშირებული ციფრული სერვისების გამოყენების ხელშეწყობა;
- პროექტის დანერგვის მხარდაჭერა.
სებასტიან მოლინეუსის თქმით, პროექტი საქართველოს ეკონომიკურ განვითარებას დააჩქარებს. აგრეთვე, დაეხმარება ქვეყნას უზრუნველყოს „სოფლის მოსახლეობისა და რეგიონებში მოქმედი საწარმოებისათვის იმ შესაძლებლობებთან წვდომა, რითაც ქალაქის მოსახლეობა სარგებლობს“.