ეუთოს სადამკვირვებლო მისიის წინასწარი დასკვნის ანალოგიურად, აშშ-ის სახელმწიფო დეპარტამენტმაც განაცხადა, რომ საქართველოს 30 მაისის ადგილობრივ არჩევნებზე დაფიქსირდა პროგრესი იმ საერთაშორისო სტანდარტების შესრულებისკენ, რომლებიც დემოკრატიული არჩევნების ჩატარებისთვისაა საჭირო.
”თუმცა, ჩვენ ასევე ვეთანხმებით ეუთოს, რომ მნიშვნელოვანი ნაკლოვანებების მოგვარებაა საჭირო,” – განაცხადა აშშ-ის სახელმწიფო დეპარტამენტის ოფიციალურმა წარმომადგენელმა ფილიპ კროულიმ 2 ივნისს.
”ჩვენ მივესალმებით ცენტრალური საარჩევნო კომისიის მცდელობებს გამჭირვალობის გაზრდისა და საარჩევნო საჩივრებზე რეაგირების კუთხით,” – განაცხადა მან.
ცენტრალურმა საარჩევნო კომისიამ განაცხადა 2 ივნისს, რომ ხუთი უბნის შედეგები გაუქმდა ხმების დათვლის დროს დაფიქსირებული დარღვევების გამო, ხოლო ერთ შემთხვევაში – მესტიის ოლქში – ხმების შემაჯამებელი ოქმი საერთოდ არ არსებობდა.
ცესკომ საბოლოო შემაჯამებელი ოქმი 23 ივნისამდე უნდა დაამტკიცოს.
This post is also available in: English (ინგლისური) Русский (რუსული)