პრეზიდენტი ”იმედის” გამოგონილ სიუჟეტთან კავშირს უარყოფს
”აბსურდია” ის განცხადებები, რომ პრეზიდენტი ”ჩართული” და ”საქმის კურსში” იყო ტელეკომპანია ”იმედის” მიერ დადგმულ რეპორტაჟთან დაკავშირებით, განაცხადა სააკაშვილის პრესსპიკერმა მანანა მანჯგალაძემ.
”თუკი ლოგიკურად ვიმსჯელებთ, გადაცემის შედეგად გამოწვეული პანიკით და რეაქციით სწორედ ხელისუფლებას მიადგა ზიანი,”- განაცხადა მან 15 მარტს საგანგებო ბრიფინგზე, ”საქართველო დემოკრატიული ქვეყანაა და ხელისუფლებას მედიის კონტროლის ასეთი ბერკეტი არ აქვს და ეს რომ ასე არ იყოს და მთავრობა მართლა ახორციელებდეს ცენზურას, რაც დაუშვებელია, მაშინ სწორედ ხელისუფლება იქნებოდა დაინტერესებული რომ ჩარეულიყო და ეს გადაცემა ეთერში არ გასულიყო”.
მისი თქმით, პრეზიდენტის მხრიდან ”სერიოზული და საფუძვლიანი” რეაქცია მოჰყვა ამ გამოშვებას, რომელიც ”ჟურნალისტური ეთიკისა და სტანდარტების დარღვევით იყო მომზადებული”.
”საქართველოს ხელისუფლება მიიჩნევს, რომ საერთაშორისო საზოგადოების ყურადღება მიპყრობილი უნდა იყოს და არის კიდეც ისეთი რეალური ფაქტების მიმართ, როგორიც არის რუსეთის მიერ ოკუპაცია, ეთნიკური წმენდა, ცეცხლის შეწყვეტის შესახებ შეთანხმების შეუსრულებლობა, რუსეთის მიერ საქართველოს არჩეული ხელისუფლების დამხობის მიმართ დაწყებული ღია ქმედებები და ე.წ. გავლენის სფეროების აღდგენის მცდელობა და არა ამა თუ იმ ტელევიზიის მიერ მომზადებული ჟურნალისტური სტანდარტების თუნდაც უხეშ დარღვევებზე ყურადღების კონცენტრირება,”- განაცხადა მან.
პრეზიდენტის პრესსპიკერმა ასევე უარყო ”ბრალდებები” იმასთან დაკავშირებითაც, რომ ეს იყო ხელისუფლების საარჩევნო ამოცანა და ოპონენტების დისკრედიტაციის მიზნით დაგეგმილი ქმედება.
დემოკრატიული მოძრაობა – ერთიანი საქართველოს ლიდერი ნინო ბურჯანაძე და მოძრაობა სამართლიანი საქართველოსთვის ლიდერი ზურაბ ნოღაიდელი, რომლებიც ბოლო დროს რუსეთის პრემიერ-მინისტრს ვლადიმერ პუტინს ცალკ-ცალკე შეხვდნენ მოსკოვში, ”იმედის” მიერ გამოგონილი სიუჟეტების მთავარი გმირები – თბილისში ადგილობრივი არჩევნების შემდეგ მასობრივი არეულობების ორგანიზატორები იყვნენ, რასაც შემდეგ ვითომდა რუსული ინტერვენცია მოყვა.
”ის ძალები, რომლებიც ასოცირდებიან ოკუპანტ ქვეყანასთან, მათ არჩევნებში ნულოვანი შანსი აქვთ და არ აქვთ საზოგადოების მხარდაჭერა,”- განაცხადა მანჯგალაძემ, ”არ შეიძლება, რომ არჩევნების დროს ისინი ხელისუფლების ალტერნატივად ან კონკურენტად ჩაითვალონ. ხელისუფლებას ჰყავს კონკურენტები და ესენი, პირველ რიგში არიან პოლიტიკური ძალები, რომლებიც მარტივად და უბრალოდ რომ ვთქვათ, რუსეთში არ დადიან”.