ალეკო ელისაშვილი სასამართლოს კანცელარიის შენობის დაწვის მცდელობის ბრალდებით დააკავეს
ოპოზიციური კოალიციის „ლელო/ძლიერი საქართველოს“ ერთ-ერთი ლიდერი ალეკო ელისაშვილი 29 ნოემბერს, გამთენიისას, თბილისის საქალაქო სასამართლოს კანცელარიის შენობის დაწვის მცდელობის ბრალდებით დააკავეს. შინაგან საქმეთა სამინისტროს მიერ გავრცელებულ კადრებში ჩანს, რომ დაკავებულ ელისაშვილს სახეზე ჩალურჯებები აქვს, თუმცა თავად ინციდენტის ამსახველი კადრები არ ვრცელდება. ელისაშვილის ადვოკატი ინციდენტს „პროვოკაციად“ აფასებს.
შინაგან საქმეთა სამინისტროს ინფორმაციით, ალექსანდრე ელისაშვილმა, შენიღბულმა, ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის მინა, შეაღწია სასამართლოს კანცელარიის შიდა სივრცეში, სადაც პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა.
შსს-მ განაცხადა, რომ „ელისაშვილს შემთხვევის ადგილზე წაასწრეს სასამართლოს მანდატურის სამსახურის წარმომადგენლებმა, რომლებსაც ელისაშვილმა თანნაქონი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა. გაწეული წინააღმდეგობის მიუხედავად, ალექსანდრე ელისაშვილი მანდატურებმა ადგილზევე დააკავეს“.
ამავე ინფორმაციის თანახმად, დაპირისპირებისას მიღებული დაზიანებებით, მანდატურის სამსახურის ერთ-ერთი წარმომადგენელი კლინიკაში გადაიყვანეს. დაკავებისას, გაწეული წინააღმდეგობის გამო, დაზიანებები ალექსანდრე ელისაშვილმაც მიიღო.
გამოძიება სისხლის სამართლის კოდექსის 19 და 187-ე მუხლებით მიმდინარეობს, რაც დანაშაულის მცდელობას და ნივთის დაზიანებას გულისხმობს.
This post is also available in: English