4 ოქტომბრის ადგილობრივი თვითმმართველობის არჩევნებისთვის ზუსტად 08:00 სთ-ზე საარჩევნო უბნები გაიხსნა და 20:00 სთ-ზე დაიხურება. არჩევნები მთავარი ოპოზიციური პარტიების ბოიკოტის ფონზე იმართება, ხოლო ხმის მიცემის პარალელურად მასობრივი საპროტესტო აქციაა დაგეგმილი.
ცენტრალური საარჩევნო კომისიის (ცესკო) მონაცემებით, საქართველოს 3,513,818 მოქალაქეს აქვს ხმის მიცემის უფლება 3,061 საარჩევნო უბანზე. ეს რიცხვი მოიცავს 47,000 პირველად ამომრჩეველს.
ხმის მიცემა ელექტრონულად ჩატარდება ქვეყნის მასშტაბით 3,061 საარჩევნო უბნიდან 2,284-ში, რაც 3,130,348 ამომრჩეველს მოიცავს. დანარჩენ 777 უბანზე ამომრჩევლები ტრადიციული პროცედურით მისცემენ ხმას, მათ შორის 10 სასჯელაღსრულების დაწესებულებებში.
ცესკო ვარაუდობს, რომ ელექტრონული უბნების წინასწარი შედეგები საღამოს 8 საათზე, საარჩევნო უბნების დახურვიდან 1-2 საათში იქნება ცნობილი. საბოლოო შედეგები კი მოგვიანებით, ყველა ბიულეტენის ხელით გადათვლის შემდეგ გასაჯაროვდება.
არჩევნებში მონაწილეობის მისაღებად 12 პოლიტიკური პარტია დარეგისტრირდა. 2021 წლის ადგილობრივი არჩევნების დროს მათი რაოდენობა 43 იყო. ცხრა მთავარმა ოპოზიციურმა პარტიამ განაცხადა, რომ ისინი არჩევნებს ბოიკოტს უცხადებენ.
თბილისში მერობის არჩევნებში ცხრა კანდიდატი მონაწილეობს, ხოლო დარჩენილ 63 მუნიციპალიტეტში მერობისთვის 112 კანდიდატი იბრძვის. „ქართული ოცნება“ მუნიციპალიტეტების თითქმის ნახევარში უკონკურენტოდ მონაწილეობს.
წლევანდელი ადგილობრივი არჩევნების დასაკვირვებლად 28 საერთაშორისო და 27 ადგილობრივი მისიაა დარეგისტრირებული, რომელთა შორის არ არიან ტრადიციული სანდო სადამკვირვებლო ორგანიზაციები, მათ შორის ეუთო/ოდირი, სამართლიანი არჩევნებისა და დემოკრატიის საერთაშორისო საზოგადოება (ISFED), საქართველოს ახალგაზრდა იურისტთა ასოციაცია (GYLA) და „საერთაშორისო გამჭვირვალობა – საქართველო“.
This post is also available in: English