პარლამენტმა ახალი გენერალური აუდიტორი დაამტკიცა

საქართველოს პარლამენტმა 20 სექტემბერს გამართულ პლენარულ სხდომაზე ახალ გენერალურ აუდიტორად 5 წლის ვადით ცოტნე ყავლაშვილის კანდიდატურა დაამტკიცა. ყავლაშვილს 87-მა დეპუტატმა დაუჭირა მხარი, წინააღმდეგი 1 იყო.

39 წლის ყავლაშვილმა, რომელიც ამ თანამდებობაზე პარლამენტის თავმჯდომარემ, შალვა პაპუაშვილმა 16 სექტემბერს წარადგინა, ირაკლი მექვაბიშვილი შეცვალა. ამ უკანასკნელს უფლებამოსილების ვადა დღეს ამოეწურა.

„აბსოლუტურად გაცნობიერებული მაქვს ის უდიდესი პასუხისმგებლობა, რომელიც დამტკიცების შემთხვევაში დამეკისრება. ძალისხმევას არ დავიშურებ, რომ ეს უმნიშვნელოვანესი და წარმატებული ინსტიტუტი იყოს კიდევ უფრო ეფექტიანი და წარმატებული“, – განაცხადა ცოტნე ყავლაშვილმა წარდგენისას.

ცოტნე ყავლაშვილი 2006 წლიდან საქართველოს ფინანსთა სამინისტროში სხვადასხვა თანამდებობაზე მსახურობდა. 2015 წლიდან მას ფინანსთა მინისტრის მოადგილის პოსტი ეკავა.

ასევე წაიკითხეთ:

• პარლამენტმა ახალი გენერალური აუდიტორი აირჩია

This post is also available in: English (ინგლისური) Русский (რუსული)