ევროპარლამენტარები საქართველოს პრეზიდენტს გიგი უგულავას შეწყალებისკენ მოუწოდებენ

11 ევროპარლამენტარი საქართველოს პრეზიდენტს სალომე ზურაბიშვილს ერთობლივი განცხადებით მიმართავს, რომლითაც მოუწოდებს მას, თბილისის ყოფილი მერი გიგი უგულავა შეიწყალოს.

„საქართველოს ბევრმა მეგობარმა და მგზნებარე მხარდამჭერმა გამოხატა შეშფოთება [თქვენს ქვეყანაში], განსაკუთრებით ბოლო რამდენიმე თვეში გაზრდილი პოლარიზაციისა და ანტაგონიზმის გამო“, – თქვეს ევროპარლამენტარებმა და დასძინეს, რომ „ამ სამწუხარო პროცესის ერთ-ერთ გამომწვევი მიზეზი ევროპული საქართველოს ერთ-ერთი ლიდერის გიგი უგულავას დაპატიმრება იყო“.

ევროპარლამენტარებმა ოპოზიციასა და მმართველ გუნდს შორის საარჩევნო სისტემის რეფორმაზე მიღწეულ შეთანხმებაზეც ისაუბრეს, თქვეს, რომ „ეს დადებითი სიახლე წაახალისებს საქართველოს, განაგრძოს პროგრესი საკუთარი ხალხის მიერ არჩეულ ევროპულ გზაზე“. ევროპარლამენტარებმა ასევე აღნიშნეს, რომ „ამ მნიშვნელოვან საარჩევნო წელს საქართველოში პოლიტიკური სიტუაციის ნორმალიზებისთვის შეთანხმების სრული განხორციელება გადამწყვეტი იქნება“.

• 120/30-ზე – ოპოზიცია და მმართველი გუნდი საარჩევნო სისტემის რეფორმაზე შეთანხმდნენ
• „პოლიტპატიმრების“ საკითხზე ოპოზიციასა და მმართველ გუნდს შორის უთანხმოებაა

„ხელისუფლებასა და ოპოზიციას შორის ამ და სხვა საკითხებზე აზრთა სხვადასხვაობა კვლავაც გაგრძელდება, [ამიტომ] მოგმართავთ, როგორც საქართველოს პრეზიდენტს, კონსტიტუციით განსაზღვრული უფლებამოსილების ფარგლებში, გადახედოთ ბატონი უგულავას საქმეს, რომლის გათავისუფლებაც [მნიშვნელოვანი] გამოცდა იქნება ერთობლივი შეთანხმების განხორციელების გზაზე“, – განმარტეს ევროპარლამენტარებმა.

„გვწამს, რომ ეს ქმედება [პოლიტიკური ვითარების] სრული ნორმალიზაციისაკენ გადადგმული უდიდესი ნაბიჯი იქნება, რასაც საქართველოს [სხვა] მეგობრები, ისევე როგორც ჩვენც, მოუთმონლად ველოდებით“, – აღნიშნეს ევროპარლამენტარებმა.

This post is also available in: English (ინგლისური) Русский (რუსული)