Placeholder canvas
ევროპამათი თვალითმთავარი თემა

ბოსნიის დედაქალაქმა ლგბტ პრაიდს პირველად უმასპინძლა

კვირას, 8 სექტემბერს, სარაევოში პირველი პრაიდი გაძლიერებული უსაფრთხოების ფონზე გაიმართა. მარშის მოწინააღმდეგეებმა „ტრადიციული ოჯახის ღირებულებების“ მხარდასაჭერად პარალელური აქციები გამართეს.

ბოსნია-ჰერცეგოვინის დედაქალაქში კვირას, შუადღეს დაწყებულმა პირველმა პრაიდის მარშმა მშვიდობიანად ჩაიარა. მარშის მონაწილეები მეორე მსოფლიო ომის მსხვერპლთა საპატივცემულო „მარადიული ცეცხლის“ მემორიალის წინ შეიკრიბნენ და ტიტოს ქუჩის (სარაევოს მთავარი ქუჩა) გავლით, სახელმწიფო პარლამენტის შენობამდე მივიდნენ.

ორსაათიანი მსვლელობა უსაფრთხოების განსაკუთრებული ზომების ფონზე, გაუქმების მოწოდებებისა და საფრთხეების მიუხედავად, მაინც მოეწყო და ინციდენტების გარეშე დასრულდა.

ბოსნიის ლგბტქ თემის მხარდასაჭერად მარშს ადამიანის უფლებათა დამცველები ბელგრადიდან, სკოპიედან და პოდგორიცადანაც შემოუერთდნენ.

ბოსნიის მნიშვნელოვან პოლიტიკოსთაგან მარშს არავინ დასწრებია, თუმცა მარშზე მივიდნენ და ლგბტქ ადამიანებს მხარი დაუჭირეს აშშ-ის ელჩმა ერიკ ნელსონმა და სხვა ბევრმა დიპლომატმა, ისევე როგორც, ბოსნიაში მოღვაწე არასამთავრობო ორგანიზაციათა წარმომადგენლებმა.

პრაიდის მარშამდე საათნახევრით ადრე, სარაევოში მოქმედმა „ისკორაკის“ ჯგუფმა ქალაქის ცენტრთან ახლოს კონტრდემონსტრაცია გამართა. ამ კონტრმანიფესტაციის ჩატარების ამბავი საზოგადოებას „ისკორაკმა“ პარასკევს აუწყა.

კიდევ ერთი კონტრდემონსტრაცია, პრაიდის მარშის პარალელურად, თეოლოგისა და პროფესორის, სანინ მუსას წინამძღოლობით სარაევოს ციგლანეს უბანში გაიმართა. მუსას თქმით, იგი არ ეთანხმება, ერთსქესიანმა წყვილებმა თავიანთი ორიენტაცია საჯაროდ გამომზეუურონ, რადგანაც ეს „კაცსა და ქალს შორის ურთიერთობის ფუნდამენტურ ტრადიციას ეწინააღმდეგება.“

შაბათს, მარშამდე ერთი დღით ადრე, კიდევ ერთმა სამოქალაქო ჯგუფმმა – ასოციაცია „სვიეტლომ“ (Svjetlo) – ტრადიციული ოჯახის ღირებულებების მხარდამჭერი მსვლელობა ზუსტად იმ მონაკვეთზე მოაწყო, რომელიც დღეს პრაიდის მარშმა გაიარა.

„სვიეტლოს“ მარშის ლოზუნგი „ტრადიციული ოჯახის დღე“ იყო. ორგანიზატორების მიზანი „რელიგიის თუ მეცნიერების გადმოსახედიდან ტრადიციული ოჯახის ბუნებრივობისათვის“ ხაზგასმა იყო.

ბოსნია და ჰერცეგოვინა ერთადერთი ქვეყანაა ყოფილი იუგოსლავიის რეგიონში, რომელშიც საჯარო პრაიდი აქამდე არ გამართულა. ბოსნია სოციალურად კონსერვატიული ქვეყანაა, სადაც ლგბტ ფესტივალებზე აქამდე არაერთხელ უძალადიათ, ამის თვალსაჩინო მაგალითები 2008 და 2014 წლის მოვლენები იყო.

აპრილიდან მოყოლებული, რაც მარშის ჩატარების ამბავი გამჟღავნდა, პრაიდის საორგანიზაციო კომიტეტი პოლიტიკოსებისა და საზოგადოებისაგან მნიშვნელოვან ზეწოლას შეეჩეხა. მაგალითად, სარაევოს კანტონის მთავრობამ აქციის ორგანიზატორებს მოსთხოვა, თავად ეყიდათ უსაფრთხოების დამატებითი ზომებისათვის მარშის მონაკვეთის გასწვრივ დასამონტაჟებელი ბეტონის ბარიერები. როგორც BIRN-მა დაწერა, ზოგიერთმა აქტივისტმა ამ მოთხოვნის სამართლებრივობა ეჭვქვეშ დააყენა.

პირველი პრაიდი სარაევოში. ფოტო: BIRN
პირველი პრაიდი სარაევოში. ფოტო: BIRN
პირველი პრაიდი სარაევოში. ფოტო: BIRN
პირველი პრაიდი სარაევოში. ფოტო: BIRN
პირველი პრაიდი სარაევოში. ფოტო: BIRN
პირველი პრაიდი სარაევოში. ფოტო: BIRN
Via
Balkan Insight
პირველწყარო
Bosnian Capital Hosts First-Ever Pride March

მსგავსი/Related

Back to top button