რუსეთის 58-ე არმიის ნაწილები ცხინვალის სიახლოვეს განთავსდნენ, რათა ”ჩაახშონ” ქართული ძალების საცეცხლე წერტილები, განაცხადა რუსეთის სახმელეთო ძალების მეთაურის თანაშემწემ იგორ კონაშენკოვმა.
”ქართული არმიის საცეცხლე წერტილები, საიდანაც ცხინვალს და რუს სამშვიდობოებს უტევდნენ, 58-ე არმიის საარტილერიო და სატანკო შენაერთებმა ჩაახშვეს,” – იტყობინება ”ინტერფაქსი” კონაშენკოვის სიტყვებზე დაყრდნობით.
”ქართული ძალები, რომლებიც სამხრეთ ოსეთში შევიდნენ, იმყოფებიან ჩვენი შენაერთების მიერ საცეცხლე წერტილების დაცხრილვის ზონაში. ნებისმიერი სროლა ჩვენი პასუხისმგებლობის ზონაში მკაცრად იქნება აღკვეთილი,” – დასძინა მან.
პრეზიდენტმა სააკაშვილმა მანამდე 8 აგვისტოს განაცხადა, რომ 150 რუსული ტანკი, ჯავშანტრანსპორტიორი და სხვა ტიპის ჟავშანმანქანა ”შემოდის ახლა საქართველოს ტერიტორიაზე [სამხრეთ ოსეთში] როკის გვირაბის საშუალებით”.
”ეს არის აშკარა შემოჭრაა სხვა ქვეყნის ტერიტორიაზე. ჩვენ რუსული ტანკები და გამანადგურებლები გვყავს ჩვენ ტერიტორიაზე,” – დასძინა მან.