სოხუმში ცენტრალური ბაზრის ტერიტორიაზე 30 ივნისს დილით მომხდარი ორი აფეთქების შედეგად ექვსი ადამიანი დაშავდა, იტყობინება ”ინტერფაქსი” აფხაზეთის დე ფაქტო ხელისუფლების წარმომადგენლებზე დაყრდნობით.
”დაზიანებები სიცოცხლისთვის სახიფათო არ არის,” – განუცხადა სოხუმის მთავარმა პროკურორმა ალისა ბიგვავამ ”ინტერფაქსს”.
”როგორც ჩანს, აფეთქებების მიზეზი იყო მოსახლეობის დაშინება და ტურისტული სეზონის ჩაშლა,” – განუცხადა თვითგამოცხადებული რეგიონის შინაგან საქმეთა მინისტრის მოადგილემ ვლადიმერ გაიდუკოვმა ”რია ნოვოსტის”.
გუშინ გაგრაში, ასევე ბაზრის ტერიტორიაზე ორი აფეთქება მოხდა და 6 ადამიანი დაშავდა. აფხაზეთის ლიდერმა სერგეი ბაღაფშმა მომხდარს ქართული მხარის მიერ ორგანიზებული ტერაქტი უწოდა, თუმცა თბილისში ეს ბრალდება კატეგორიულად უარყვეს.
ბაღაფშმა 30 ივნისს ”რია ნოვოსტის” განუცხადა, რომ 1 ივლისიდან აფხაზური მხარე ჩაკეტავს ადმინისტრაციულ საზღვარს საქართველოსთან.