ცენტრალური საარჩევნო კომისიის (ცესკო) 20 საათის მონაცემებით ნაციონალური მოძრაობა პროპორციულ არჩევნებში 59.21%-ით ლიდერობს, ხოლო გაერთიანებულ ოპოზიციას 16,48% აქვს.
ეს მონაცემები 2 462 უბნის შედეგებს ეყრდნობა, რაც საარჩევნო სუბიექტებისათვის მიცემული ხმების ნახევარზე მეტია. სულ 3 558 უბანია შესაჯამებელი.
ცესკოს წინასწარი მონაცემებით, მესამე ადგილზეა ქრისტიანულ-დემოკრატიული პარტია ხმათა 8.29%-ით, ხოლო მეოთხეზე ლეიბორისტული პარტია 6.83%-ით.
5%-იან ბარიერს მიღმა რჩება რესპუბლიკური პარტია, რომელსაც ხმათა 3.7% აქვს. დანარჩენმა შვიდმა პარტიამ და საარჩევნო ბლოკმა 1%-ზე ნაკლები ხმები დააგროვეს.
ცესკო წინასწარ ოფიციალურ შედეგებს, სავარაუდოდ, ხვალ დილით გამოაცხადებს. კანონის თანახმად, შეჯამების პროცესი არჩევნებიდან 18 დღეში უნდა დასრულდეს.