საქართველოს წარმომადგენლობა ეუთოში დააყენებს ორგანიზაციის მუდმივ საბჭოზე რუსეთის მიერ ცალმხრივად მიღებული გადაწყვეტილების განხილვის საკითხს, რომელიც აფხაზეთისათვის ეკონომიკური სანქციების მოხსნას უკავშირდება.
გასულ კვირას რუსეთი ცალმხრივად გამოვიდა დსთ-ს 1996 წლის შეთანხმებიდან, რომელიც აფხაზეთს ეკონომიკურ სანქციებს უწესებს, მათ შორის იარაღით ვაჭრობის სფეროში. ამ ნაბიჯს თბილისმა ”ამორალური და ძალიან სახიფათო” უწოდა.
”ეს არის რეალურად კონფლიქტის მოგვარების წინააღმდეგ გადადგმული ნაბიჯი,”- განუცხადა საგარეო საქმეთა მინისტრმა დავით ბაქრაძემ ჟურნალისტებს, ”რაც შეეხება ეუთოს რეაქციას, ვნახოთ, ყველაფერი დამოკიდებული იმაზე, თუ როგორ წარიმართება საკითხის განხილვა. ნებისმიერ შემთხვევაში ჩვენთვის მაინც მნიშვნელოვანია საერთაშორისო პოლიტიკური მხარდაჭერის მიღება”.