საქართველოს პრეზიდენტმა მიხეილ სააკაშვილმა ჩრდილოატლანტიკურ ალიანსს ოფიციალური წერილით მიმართა, სადაც გამოთქვამს ნატოს გაწევრიანების სამოქმედო გეგმასთან (MAP) მიერთების მზადყოფნას და თხოვს ალიანსს მიიღოს შესაბამისი გადაწყვეტილება.
აღნიშნული წერილი 14 თებერვალს ნატოს შტაბ-ბინაში საქართველოს მისიის ხელმძღვანელმა რევაზ ბეშიძემ პირადად გადასცა ნატოს გენერალურ მდივანს იააპ დე ჰოოპ სხეფერს.
საქართველომ MAP-ის მიღების თაობაზე მიმართვა ნატოს აპრილში, ბუქარესტში დაგეგმილი სამიტის წინ გაუგზავნა.
იმავდროულად, აშშ-ს სენატის საგარეო ურთიერთობათა კომიტეტმა 13 თებერვალს მიიღო სპეციალური რეზოლუცია, რომელიც მხარს უჭერს საქართველოსა და უკრანისათვის MAP-ის დამტკიცებას.