სააკაშვილი ამერიკელ სენატორებთან ერთად რეგიონებს სტუმრობს

პრეზიდენტმა სააკაშვილმა, რომელიც ამერიკელ სენატორთა დელეგაციასთან ერთად საქართველოს რეგიონებს სტუმრობს, 27 აგვისტოს განაცხადა, რომ საქართველო ამჟამად აშშ-ის პოტენციურ მომავალ პრეზიდენტს სტუმრობს, მიანიშნა რა სენატორ ჯონ მაკკაინზე.

”შარშან ჩვენ გვქონდა პატივი გვემასპინძლა ამერიკის პრეზიდენტისთვის [ჯორჯ ბუში] და თუ ამერიკულ პრესას დავუჯერებთ, დიდი ალბათობით შეგვიძლია განვაცხადოთ, რომ დღეს ჩვენ ვმასპინძლობთ ამერიკის მომავალ პრეზიდენტს [სენატორ მაკკეინს]. და თუ გავითვალისწინებთ სხვა სენატორების ასაკს [მიანიშნა დელეგაციაში შემავალ სხვა სენატორებზე], ჩვენ შეიძლება ვმასპინძლობთ ამერიკის სხვა შესაძლო პრეზიდენტებსაც. ასე რომ საქართველო პრეზიდენტების სამჭედლოა,” – განაცხადა პრეზიდენტმა სააკაშვილმა მცხეთაში სასამართლოს ახალი შენობის გახსნის ცერემონიალზე, რომელსაც ამერიკელი სენატორებიც ესწრებოდნენ.

სააკაშვილმა ასევე აღნიშნა, რომ სენატორი მაკკეინი საქართველოში მიმდინარე სასამართლო რეფორმის ერთ-ერთი დიდი გულშემატკივარია.

აშშ-ს სენატორთა ჯგუფი, რომლის შემადგენლობაშიც შედიან ჯონ მაკკეინი, საქსბი ჩამბლისი, ლინდსი გრეჰამი და მელ მარტინესი, საქართველოში 26 აგვისტოს ჩამოვიდა. დელეგაცია სვანეთს და აჭარასაც ეწვევა.

This post is also available in: English Русский