საქართველოს პრემიერ–მინისტრის ზურაბ ნოღაიდელის განცხადებით, დღეს მთავრობამ მიიღო გადაწყვეტილება, რომ მგზავრებს, რომლებიც რუსეთიდან საქართველოს მიერ არაკონტროლირებადი როკის გვირაბის მეშვეობით ბრუნდებიან, 14 ივლისამდე ერგნეთის საგუშაგოზე [სამხრეთ ოსეთთან ადმინისტრაციულ საზღვარზე] გამოატარებენ.
ქართული მხარის განმარტებით, ეს “ჰუმანიტარული“ მოსაზრებებით კეთდება.
ამასთან, ნოღაიდელის განცხადებით, ეს შეღავათი არ გავრცელდება ტვირთებზე, რომელთა შემოტანასაც როკის გვირაბის მეშვეობით ცდილობენ იმის გამო, რომ 8 ივლისს საქართველო–რუსეთის ერთადერთი ლეგიტიმური სასაზღვრო გამშვები პუნქტი –ზემო ლარსი – რუსეთის მიერ სარემონტო სამუშაოების დაწყების მოტივით დაიკეტა.
ნოღაიდელის განცხადებით, ქართული მხარის მონაცემებით, ზემო ლარსზე სარემონტო სამუშაოები ჯერ არ დაწყებულა და საზღვრის დაკეტვის “ნამდვილი მიზეზი“ გაურკვეველია.
This post is also available in: English (ინგლისური) Русский (რუსული)