სააკაშვილი მიესალმება თანამშრომლობას სუამის ფარგლებში

საქართველოს პრეზიდენტმა 23 მაისს კიევში სუამის ლიდერების სამიტის შემდეგ გამართულ პრესკონფერენციაზე  განაცხადა, რომ ეს ორგანიზაცია, რომელიც საქართველოს, უკრაინას, აზერბაიჯანს და მოლდოვას აერთიანებს და რომელიც დემოკრატიისა და ეკონომიკური განვითარების რეგიონალურ ორგანიზაციად გარდაიქმნა, ახალ იმპულსს იძენს და თავის „საერთაშორისო რეპუტაციას“ ზრდის.
 
„ეკონომიკური ემბარგოს ფონზე, ჩვენ შევთანხმდით შემოვიღოთ თავისუფალი სავაჭრო რეჟიმი ჩვენს ქვეყნებს შორის. ეს არის ძალიან კონკრეტული სარგებელი [სუამის] ყველა სახელმწიფოსთვის, ყველა მოქალაქისა და მწარმოებლისთვის, ასევე ექსპორტიორისა და იმპორტიორისთვის“, – განაცხადა პრეზიდენტმა სააკაშვილმა.
 
მან ასევე განაცხადა, რომ მიუხედავად დაბრკოლებებისა, სუამის წევრი სახელმწიფოები „ძალიან დინამიურად“ ვითარდებიან.
 
„ბოლო დროს სუამის წევრი სახელმწიფოების საერთაშორისო რეპუტაცია მნიშვნელოვნად გაიზარდა და გაძლიერდა“, – დასძინა მან.
 
ახალი რეგიონალური ორგანიზაციის შტაბბინა კიევში განთავსდება.
 
„ჩვენ მივესალმებით ინიციატივას და უკრაინის ხელმძღვანელობას და ჩვენ გვესმის, რომ თითოეული [სუამის წევრი] სახელმწიფო უნდა გახდეს ლიდერი იმ სფეროში, სადაც მას შეუძლია მაქსიმალურად წარმატებული იყოს“, – განაცხადა სააკაშვილმა. 
 
„ჩვენ განვიხილეთ საერთაშორისო ტერორიზმთან, სეპარატიზმთან, ექსტრემიზმთან და ტრანსნაციონალურ ორგანიზებულ დანაშაულთან დაკავშირებული საკითხები… რომლებიც მიჩნეულია მნიშვნელოვან დაბრკოლებად დემოკრატიული განვითარების გზაზე“, – განაცხადა უკრაინის პრეზიდენტმა ვიქტორ იუშჩენკომ სამიტის შემდეგ.
 
სუამის ლიდერთა სამიტს ასევე დაესწრნენ ლიტვის პრეზიდენტი ვალდას ადამკუსი, ბულგარეთის, რუმინეთის, აშშ-ს და ეუთოს წარმომადგენლები.