სომხეთი გაზსადენის რუსეთისთვის მიყიდვაზე უარს აცხადებს

სომხეთის ოფიციალურმა პირებმა უარყვეს ინფორმაცია იმის თაობაზე, რომ მათ ირან-სომხეთის გაზსადენის აქციების 45% რუსეთს მიყიდეს იაფი გაზის სანაცვლოდ, იტყობინება რუსული გაზეთი „კომერსანტი“.

რუსეთმა სომხეთს 2006 წლიდან გაზის ღირებულება 54 აშშ დოლარიდან 110 აშშ დოლარამდე გაუზარდა. „კომერსანტის“ ცნობით, მოსკოვმა ულტიმატუმი წაუყენა სომხეთს: ან სომხეთი ირანი-სომხეთის გაზსადენის აქციებს მისცემს „გაზპრომს“ ან გაზის ღირებულება სომხეთისთვის 110 აშშ დოლარამდე გაიზრდება.

„ეს წინადადება ჩვენთვის მიუღებელი იყო და რჩება“, – იტყობინება გაზეთი სომხეთის მთავრობის ანონიმურ წყაროზე დაყრდნობით.

გაზეთის ცნობით, თუ „გაზპრომი“ ხელში ჩაიგდებს ამ გაზსადენს, მომავალში რუსეთი შეძლებს გააკონტროლოს ირანული გაზის მიწოდება სომხეთში, საქართველოსა და უკრაინაში.  

This post is also available in: English (ინგლისური) Русский (რუსული)