ჩხიკვიშვილი: ბუნებრივი აირზე ფასის გაზრდა არ არის პოლიტიკური ზეწოლა

რუსეთის ელჩმა საქართველოში ვლადიმერ ჩხიკვიშვილმა დღეს “გაზექსპორტის“ ხელმძღვანელთან დავით მორჩილაძესთან ერთად გამართულ ბრიფინგზე “გაზპრომის“ მიერ საქართველოსთვის 2006 წლიდან ბუნებრივი აირის საფასურის გაზრდასთან დაკავშირებით განაცხადა, რომ “ეს არ არის პოლიტიკური ზეწოლა“.  


“ბოლო ათი წლის განმავლობაში გაზი ან სხვა რამ არ გამოყენებულა, როგორც [საქართველოზე] პოლიტიკური ზეწოლის ელემენტი და ეს არ არის ჩვენი [რუსეთის] პოლიტიკა“, – განაცხადა 28 დეკემბერს ვლადიმერ ჩხიკვიშვილმა.


“გაზექსპორტის“ ხელმძღვანელის დავით მორჩილაძის განცხადებით, უკვე გაფორმებულია ხელშეკრულება “გაზპრომთან“ 2006 წლის განმავლობაში 2,5 მილიარდი კუბამეტრი ბუნებრივი აირის მოწოდების თაობაზე. გაზის ღირებულება კი 1000 კუბამეტრზე 110 აშშ დოლარი იქნება, ნაცვლად 63 დოლარისა.


დღესვე მთავრობის სხდომაზე პრემიერ-მინისტრმა ზურაბ ნოღაიდელმა განაცხადა, რომ მთავრობა აგრძელებს მუშაობას, რათა ზამთრის პერიოდში მოსახლეობისთვის ბუნებრივი აირის საფასური არ გაიზარდოს.

This post is also available in: English (ინგლისური) Русский (რუსული)

Exit mobile version