Civil.ge-ს შესახებ
Eng | ქარ | Рус
ბოლო განახლება: 15:53 - 28 აპრ.'17
RSS
Mobile
Twitter
Facebook
დემეტრაშვილი: დეპუტატთა რაოდენობის გაზრდის ერთადერთი გზა ახალი რეფერენდუმია
სივილ ჯორჯია, თბილისი / 29 ივნ.'11 / 16:54

დეპუტატთა რაოდენობის 150–დან 190–მდე გაზრდა ახალი რეფერენდუმის ჩატარების გარეშე კანონდარღვევა იქნება, განაცხადა ავთანდილ დემეტრაშვილმა, საკონსტიტუციო სასამართლოს ყოფილმა თავმჯდომარემ 29 ივნისს.

საარჩევნო რეფორმაზე შეთანხმების ერთ–ერთი მთავარი ნაწილი, რომელსაც მმართველმა პარტიამ რამოდენიმე ოპოზიციურ პარტიასთან ერთად მოაწერა ხელი, დეპუტატთა რაოდენობის 190 წევრამდე ზრდას ითვალისწინებს. ამ გადაწყვეტილების შესრულებას სამართლებრივი პრობლემები ექმნება, რადგან ოპონენტების თქმით, ის ეწინააღმდეგება 2003 წლის რეფერენდუმის შედეგებს, რომლის დროსაც ამომრჩეველთა 83.5%–მა მხარი დაუჭირა პარლამენტის რიცხოვნობის 235–დან არაუმეტეს 150–მდე შემცირებას.

რეფერენდუმის შესახებ ორგანული კანონის მიხედვით, "რეფერენდუმის შედეგად მიღებული გადაწყვეტილების შეცვლა ან გაუქმება შეიძლება მხოლოდ რეფერენდუმით“.

"დეპუტატთა რაოდენობის გაზრდისათვის არსებობს ერთადერთი გზა და ეს არის მხოლოდ რეფერენდუმი. თუ ამ გზით არ მოხდა ეს ცვლილება, ეს იქნება კანონის უხეში დარღვევა და მე არ გამოვრიცხავ კონსტიტუციის დარღვევაც“, – განუცხადა ავთანდილ დემეტრაშვილმა 29 ივნისს Civil.ge-ს.

საქართველოს კონსტიტუციის ერთ–ერთი თანაავტორი, ავთანდილ დემეტრაშვილი 1996–2001 წლებში საქართველოს საკონსტიტუციო სასამართლოს პირველი თავმჯდომარე იყო. 2009–2010 წლებში ის თავმჯდომარეობდა სახელმწიფო კომისიას, რომელმაც შეიმუშავა კონსტიტუციის ახალი მოდელი, რომელიც ძალაში 2013 წლის ბოლოდან შევა. ამჟამად, ავთანდილ დემეტრაშვილი ხელმძღვანელობს ბათუმში განთავსებულ კონსტიტუციონალიზმის კვლევისა და ხელშეწყობის რეგიონალურ ცენტრს, რომლის მიზანიც არის სამართლებრივი დახმარების გაწევა საკანონმდებლო და კონსტიტუციურ საკითხებში.

დემეტრაშვილის თქმით, ის რომ არც 2003 წლის რეფერენდუმის შედეგები და არც ის ფაქტი არ არის გასაჩივრებული, რომ ამ შედეგების ასახვა კანონმდებლობაში ერთთვიანი ვადის დარღვევით, 2005 წლის თებერვალში მოხდა, ნიშნავს იმას, რომ "ეს წესი მოქმედებს“.

დემეტრაშვილის განცხადებით, ერთადერთი, რაც ამ ეტაპზე შეიძლება გასაჩივრდეს არის ის, რომ საკონსტიტუციო სასამართლოში შევიდეს ინდივიდუალური სარჩელი, რომელსაც ხანდაზმულობის ვადა არ აქვს, რომელშიც მოსარჩლე გააპროტესტებს იმ ფაქტს, რომ რეფერენდუმის შედეგის ასახვა კანონმდებლობაში ერთთვიანი ვადის დარღვევით მოხდა და ამიტომ კონსტიტუციის 49–ე მუხლის 1–ლი პუნქტი, რომელიც პარლამენტის რიცხოვნობას ასახავს, ბათილად იქნეს ცნობილი. 

“თუმცა, მე რომ ვიყო მოსამართლე, ამ სარჩელის დაკმაყოფილებას მხარს არ დავუჭერდი, რადგან ამ საკითხთან მიმართებაში რეფერენდუმზე გამოხატული ხალხის ნება უფრო მაღალია, ვიდრე მისი წარმომადგენლობითი ორგანოს [პარლამენტის] მიერ მიღებული გადაწყვეტილება“,  – განაცხადა დემეტრაშვილმა.

მისი თქმით, საკონსტიტუციო სასამართლომ კონსტიტუციურ კანონში პარლამენტის რიცხოვნობასთან დაკავშირებული შესწორების ბათილობის შესახებ გადაწყვეტილება რომც მიიღოს, რეფერენდუმის შედეგები მაინც ძალაში რჩება.  

ავთანდილ დემეტრაშვილმა ასევე განაცხადა, რომ არსებული ფაქტია, რომ დეპუტატების რაოდენობის 235–დან 150–მდე შემცირების შესახებ პარლამენტის გადაწყვეტილება რეფერენდუმის შედეგების კანონმდებლობაში ასახვა და კანონმდებლობის მასთან შესაბამისობაში მოყვანა იყო.

მმართველი პარტია აცხადებს, რომ მაშინ როდესაც ეს გადაწყვეტილება იქნა მიღებული, პარლამენტი ფორმალურად რეფერენდუმის შედეგებს არ დაყრდნობია.

დემეტრაშვილმა კომენტარი გააკეთა ასევე მმართველი პარტიის იმ არგუმენტზეც, რომლის მიხედვითაც რეფერენდუმის შედეგები არაკონსტიტუციურია, რადგან კონსტიტუციის 74 მუხლის მეორე პუნქტი ამბობს, რომ "არ შეიძლება რეფერენდუმის მოწყობა კანონის მისაღებად ან გასაუქმებლად“.

2003 წლის რეფერენდუმზე დასმული შეკითხვის შინაარსი ეხებოდა ცვლილების შეტანას და არა კანონის "მიღებას ან გაუქმებას“. თუმცა საკანონმდებლო შესწორება ცვლილებების ან დამატებების შეტანის შესახებ კანონის მიღებით ხორციელდება.

დემეტრაშვილის განცხადებით, სარეფერენდუმო შეკითხვის ფორმულირება  – „თანახმა ხართ თუ არა, რომ საქართველოს პარლამენტის წევრთა რაოდენობა შემცირდეს და განისაზღვროს არა უმეტეს 150 დეპუტატით“, არ შეიცავდა პირდაპირ დასმულ კითხვას კანონის გაუქმების ან მიღების თაობაზე. 

“ამდენად რეფერენდუმის ჩატარება იყო ლეგიტიმური და მისი შედეგების ბათილად ცნობა, ჩემი აზრით, შეუძლებელია“, სხვაგვარად, თუ არა ახალი რეფერენდუმის მოწყობის გზით, განაცხადა დემეტრაშვილმა.

რეფერენდუმის შესახებ კანონის მიხედვით, "რეფერენდუმი შეიძლება მოეწყოს განსაკუთრებით მნიშვნელოვან სახელმწიფოებრივ საკითხებზე, მათ შორის საქართველოს კანონებით, საერთაშორისო ხელშეკრულებებითა და შეთანხმებებით გათვალისწინებული საკითხებისა და პრინციპების შესახებ“.

ამავე კანონის მიხედვით, რეფერენდუმის შედეგად მიღებული გადაწყვეტილება ძალაში შედის მისი გამოქვეყნების დღიდან, აქვს პირდაპირი მოქმედების იურიდიული ძალა და საბოლოოა; საქართველოს ხელისუფლება ვალდებულია რეფერენდუმის შედეგებიდან გამომდინარე ერთ თვეში შესაბამისობაში მოიყვანოს საქართველოს კანონმდებლობა და სხვა აქტები.

რეფერენდუმის შედეგების ბათილად ცნობის უფლება აქვს მხოლოდ საკონსტიტუციო სასამართლოს. 

კანონი საკონსტიტუციო სასამართლოს შესახებ ადგენს, რომ ჩატარებული რეფერენდუმის კონსტიტუციურობის შესახებ სარჩელი შეიტანება ცესკოს მიერ „რეფერენდუმის შედეგების გამოქვეყნებიდან 7 დღის ვადაში“. სარჩელის შეტანის უფლება აქვთ საქართველოს პარლამენტის წევრთა არანაკლებ ერთ მეხუთედს, საქართველოს პრეზიდენტს და საქართველოს სახალხო დამცველს.

უახლესი ამბები
28 აპრ.'17 15:53
Freedom House: საქართველოს რეიტინგი პრესის თავისუფლების ინდექსში გაუარესდა
Freedom House-ის კვლევაში საქართველომ წინა წელთან შედარებით ერთი ქულით ნაკლები მიიღო. 
27 აპრ.'17 18:36
საგარეო საქმეთა მინისტრებმა გერმანულ-ქართული წელი გახსნეს
მიხეილ ჯანელიძე თავის გერმანელ კოლეგას ზიგმარ გაბრიელს ბერლინში ვიზიტის დროს შეხვდა.
27 აპრ.'17 17:44
საქართველო და რუმინეთი სავაჭო და პოლიტიკური ურთიერთობების გაღრმავებაზე შეთანხმდნენ
პრემიერ-მინისტრებმა დიპლომატიური ურთიერთობების 25 წლისთავთან დაკავშირებით დეკლარაცია მიიღეს.
27 აპრ.'17 09:46
ბათუმის მოვლენების ორგანიზების ბრალდებით სასამართლომ ორ პირს პატიმრობა შეუფარდა
11-12 მარტს ბათუმში განვითარებულ მოვლენებთან დაკავშირებით 21 პირია დაკავებული.
26 აპრ.'17 17:34
თბილისი იერუსალიმის პატრიარქის მიერ აფხაზეთზე გაკეთებული განცხადების გამო შეშფოთებულია
საქართველოს ელჩი ისრაელში იერუსალიმის პატრიარქს თეოფილოს III-ს შეხვდა და მისი აფხაზ მომლოცველებთან შეხვედრის საკითხი განიხილა.
26 აპრ.'17 13:54
სეპარატისტული სამხრეთ ოსეთის მთავრობა გადადგა
რეგიონის ახალი ლიდერი ანატოლი ბიბილოვი ახალი მთავრობის ფორმირებას ორ კვირაში გეგმავს.
26 აპრ.'17 13:38
საქართველოს რეიტინგი პრესის თავისუფლების ინდექსში უცვლელი დარჩა
„რეპორტიორები საზღვრებს გარეშე“-ს რეიტინგში საქართველო 27,76 ქულით 180 ქვეყანას შორის 64-ე ადგილზეა
26 აპრ.'17 12:34
საქართველომ ევროპის ენერგეტიკულ გაერთიანებაში შესვლის შესახებ შეთანხმების რატიფიცირება მოახდინა
საქართველოს პარლამენტში შეთანხმების რატიფიცირებას 89 დეპუტატმა ერთხმად დაუჭირა მხარი.
25 აპრ.'17 19:00
საქართველოს თავდაცვის სამინისტრომ 2017-2020 წლების თავდაცვის სტრატეგიული მიმოხილვა გამოაქვეყნა
თავდაცვის სამინისტრო რუსეთს მთავარ საფრთხედ მიიჩნევს და თავდაცვითი შესაძლებლობების გაძლიერებისკენ ისწრაფვის.
25 აპრ.'17 16:59
სოხუმმა ეთნიკური ქართველებისთვის ბინადრობის ნებართვების გაცემა დაიწყო
სეპარატისტული აფხაზეთის ხელისუფლებამ მოქალაქეობის არმქონე პირებისთვის ახალი ხუთწლიანი დოკუმენტები შემოიღო.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
48